Me fizió muito goyo presentar, chunto con Chusé Inazio Nabarro, l'auto d'omenache a os profesors Francho Nagore e Chesús Vázquez o pasau 17 de chunio en a Facultad de Ciencias Humanas y de la Educación de Huesca. Con ixe omenache, se quereba dar-lis as grazias por aber adedicau toda una bida academica, profesional e presonal a a esfensa, estudio e dignificazión de l’aragonés
Tamién ha siu un plazer poder partizipar, chunto con Óscar Latas, en o libro Arredol d’a parola. Conoxer, amar, esfender l'aragonés, una obra coral, en a que se replegan treballos en onor a istos dos doctors e reconoxius imbestigadors d’a Filolochía Aragonesa. A nuesa contribuzión ha bersau sobre "Matías Pradas y un villancico barroco en aragonés del siglo XVII". En ella, se aportan intresans datos sobre a bida e a obra d'o escritor en aragonés Matías Pradas e se meten de manifiesto as similituz que o suyo romanze «Encara que no he fablado» tiene con un villanzico barroco en luenga aragonesa, «Agüera, agüera, agüera», interpretau en 1699 en a ilesia colechial de Santa María de Calatayud.
